«Каб скончыць войны»

9 Агульны бал

Не будзь пераможаны злом, а перамагай зло дабром

Да Рымлянаў 12:21

«Каб скончыць войны» – фільм з таго ж эпічнага шэрагу, што і найлепшыя экранізацыі Быкава, галівудскія карціны пра В’етнам ці «Халоднае лета 53-га..» Бязлітасныя абставіны ставяць чалавека на мяжу жыцця і смерці – і выяўляюць, кім ён насамрэч ёсць.

jj

Батальён маладых шатландцаў, паланёных японцамі ў колішняй брытанскай калоніі, трапляе ў канцлагер у джунглях. Афіцэры, што нават пад вартай кідаюць выклік ворагам, самі нарываюцца на смерць. Палонныя дзеляцца на тых, хто рыхтуе збройныя ўцёкі – і тых, хто моліцца ды ладзіць патаемны ўніверсітэт. Збіраючыся каля прыбіральні.

Героям, якія ненавідзяць японцаў, не хапае цярплівасці. Ціхоням, якімі грэбуюць героі, дастае духу жыць у лагеры паводле Бібліі. Як скончаныя эгаісты пераўтвараюцца ў самаахвярных вернікаў, а жорсткія байцы – у плачучых хлопчыкаў, можна даведацца толькі калі праглядзець фільм цалкам.

ssss

Тут празрыстая беларуская сучаснасць – акупанты, страх вакол, прыніжэнні і японскі АМАП. Тут і чужацкі кодэкс гонару – няўмольнае і па-свойму спрвядлівае «бушыдо». Ёсць і крыж, на якім хрысціянін аддае сябе за свайго супраціўніка – правадыра прыхільнікаў гвалту. І нечаканы фінал – эпілог…

У спецкамендатуры Купліна, дзе «хімікам» ужо абрыдлі жудзікі пра вампіраў, «Каб скончыць войны» глядзелі як адкрыццё. А то дзіва: па-беларуску, ды яшчэ калі сам у клетцы, а кожны загад адміністрацыі перагукаецца з віскам закратаваных дзвераў.

І тым, хто сёння чуе вакол зняважлівыя вокрыкі ды адчувае страх, хто хоча выжыць і не страціць годнасці, хто баіцца, абы не было вайны, у вайну гуляецца, пра вайну марыць, змагарам, анлайнерам і ўсім нам – варта паглядзець «Каб скончыць войны».

Дзеля чаго?

Каб ведаць, як перамагчы.

Павал Севярынец

Падзяліцца запісам

  • Facebook
  • Twitter
  • Google Buzz

Падзяліцца меркаваннем